Errekazaleen bihotza eta begiak bitan banatuak egon dira asteburu honetan. Gizonezkoek, txapeldunen fasean lehenbizikoak izan ondotik, lauko finala Donezteben jokatzeko eskubidea irabazia zuten eta herriko zaleen aitzinean ez zuten hutsik egin. Larunbateko finalerdian, Errekak nagusitasunez irabazi zion BM Bardenas taldeari, 33-26. Bertze finalerdian, Cantolaguak 27-22 irabazi zion BM Ardoi taldeari. Igandeko finalean Errekak 24-22 irabazi zion Zangozako Cantolagua taldeari, Doneztebeko kiroldegiko harmailak lepo bete zuten zaleen gozamenerako.
Errekako emakumeek, berriz, Iruñeko Arrosadian zuten hitzordua. Larunbateko finalerdi estuan 26-25 irabazi zioten Replasa Beti-Onak taldeari. Bertze finalerdian, BM Ardoi taldeak uste baino larriago irabazi zion Grafometal Sporting Viana taldeari, 24-23. Gauzak honela, igande goizean, mutilek Donezteben jokatzen zuten ordu berean, Arrosadian finala jokatu zuten Errekako emakumeek Zizurko BM Ardoiren kontra. Jokatu eta irabazi, 27-25- Zoramena harmailetan, zoramena pistan eta zoramena Doneztebeko kiroldegian ere, pantailaren bidez segitu baitzuten emakumeen partida ere.