Mendaroko Txirrindulari Elkarteak antolatuta, Mendaro Herria lasterketa jokatu zuten igande goizean Mendaron. Hego Euskal Herriko 199 txirrindularik eman zuten izena eta 48 kilometroko ibilbidea osatu behar izan zuten: Mendaro-Bergara-Mendaro. Abiatu aitzinetik minutu bateko isilunea gorde zuten, joan den astelehenean Usurbilen istripuz hil zen Iñaki Bakea Artsuaga txirrindularia gogoratzeko.
Hainbat ihesaldi izan baziren ere, esprintean erabaki zen lasterketa. Sunbillako Ander Larraburu (Erro y Ergui-Arga Carretilla) izan zen azkarrena. Kadete mailako pistako Espainiako Kopa irabazi zuen otsail hasieran 15 urteko txirrindulari sunbildarrak, esprintetan ederki moldatzen dela erakutsiz. Larrabururen gibeletik sartu ziren Peio Legina (F2 Informatica) eta Unai Aranburu (Inoxcra-Beasain). Taldeka ere, Larrabururen Erro y Ergui-Arga Carretilla taldekoak izan ziren nagusi.
