Ezbeharra bart gauerdi aldera gertatu da Sunbillan bide zaharreko sarreran, Beobiko borda ondoko zubibidean. Ageri denez, motozikleta baten eta kamioi baten arteko aurrez aurreko talkaren ondorioz, motorzalea (58 urteko irundarra) zubitik Bidasora erori eta hil egin da. Foruzaingoak jakitera eman duenez, kamioia kontrako bidetik zihoan eta gidaria (txekiarra) atxilotu egin dute «arduragabekeriaz gidatzeagatik». Epailearen esku utzi dute.
Istripuaren tokira osasun-langileak, Oronoz-Mugairiko parkeko suhiltzaileak eta Foruzaingoaren patruilak bertaratu dira, eta haiek arduratu dira eginbideez. Motorzalearen gorpua Iruñera eraman dute autopsia egiteko.
N-121-A errepidean azkeneko bi asteotan trafiko istripuz hil den bigarren pertsona da. Uztailaren 2an, 49 urteko gidari iruindar bat hil zen Beran, enpresako ibilgailu batekin bidetik atera eta Bidasora erorita.
Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.