Doneztebeko osasun etxeak jakinarazi duenez, Covid positiboen gorakadak lan egiteko modua aldatu du «herritarrei arreta onena eskaini ahal izateko». Hori horrela, uztailean herrietako hainbat kontsultategietan ez da erizaintzako kontsulta besterik izanen.
Lehenbiziko hamabostaldian Donamaria, Oiz, Urroz, Beintza-Labaien eta Saldiasen erizaintzako kontsulta baino ez dute izanen. Bigarren hamabostaldian, berriz, Ituren, Zubieta, Ezkurra eta Eratsungo kontsultategietan erizainarekin bakarrik hartu beharko da hitzordua. Hortaz, kontsultategi horietako mediku-arreta Doneztebeko osasun zentrotik eginen da eta zentrora joan ezin dutenak etxean artatuko dituzte.
Gainerako egunetan, ezustekorik ez bada, ohiko funtzionamendua izanen dute kontsultategiek. Bide batez, osasun etxetik, herritarrei eta establezimenduei laguntza eskatu diete, «17 eta 30 urte bitartekoen artean covid araudia betetzeko».