Osasunbideak akitu ditu Doneztebeko Osasun Zentro berriko lanak eta laster zabalduko ditu ateak. Uztailaren 17an eginen dute oraingo osasun zentrotik berrirako aldaketa. Hortaz, egun horretan, larrialdi kasuak baino ez dituzte artatuko. Eta hori 948 45 60 01 telefonora deituta eginen dute. Hasiera batean osasun zentro zaharrean pasatuko dituzte kontsultak, eta behin, aldaketa akitutakoan, berrian hasiko dira.
2,9 milioi euroko inbertsioa
1.400 metro koadroko solairu bakarreko eraikinean 2,9 milioi euroko inbertsioa egin dute eta 5.338 bizilagun artatuko ditu. Zentro honetan, lehen arreta, erretinografia, erradiologia eta errehabilitazio osasun zerbitzuak eskainiko dituzte, azken hauek eskualde osorako.