erran.eus

XVII. Ramon Latasa saria jokatuko da abuztuaren 11n Sunbillan

  Kirola  Malerreka  Sunbilla

Bortz aizkolari bikoteren arteko lehiaz gain, garai bateko aizkolarien lehia eta Ousmane Drame eta Xanta Sousak marka ahalegina eginen dute txingekin

Abuztuaren 11n, larunbatean, 19:00etatik aitzinera Ramon Latasaren omenezko sariketa jokatuko da Sunbillako pilotalekuan hamazazpigarren aldiz. Historiak eman duen aizkolaririk onenetako bat izan zen Ramon  Latasa, eta  urtero bezala, hamar aizkolari onentsuenak ariko dira haren oroimenezko lehiaketan. 

XVII. Ramon Latasa saria jokatuko da abuztuaren 11n Sunbillan
Ruben Saralegi eta Iker Vicente lehengusuak nagusitu ziren iaz. Aurten ez dira elkarrekin ariko. | Ikusi handiago | Argazki originala

 

Bost bikotetan ariko dira lehian: Aitzol Atutxa II.a eta Julen Alberdi ‘Txikia’; Donato Larretxea eta Iker Vicente; Mikel Larrañaga eta Ugaitz Mugertza; Joseba Otaegi eta Jon Rekondo eta Ruben Saralegi eta Xabier Orbegozo Arria V.a. Bikote bakoitzak hamar kanaerdiko eta sei 60 ontzako ebaki beharko ditu.

Ekitaldi berean, Nafarroako eta Gipuzkoako aizkolari beteranoen  arteko lehia berezia ikusiko da. Alde batetik Migel Mindegia eta Patxi Astibia eta bertzetik,  Angel Arrospide eta Jose Ignazio Orbegozo Arria II.a neurtuko dira. Bikote bakoitzak sei kana-erdiko ebaki beharko ditu.

Jaialdi honen barrenean, Barakaldon bizi den Ousmane Drame senegaldarra munduko marka hobetzen ahaleginduko da 100 kiloko txingekin.  Xanta Sousa Lesakan bizi den brasildarrak ere marka ahalegina egiteko asmoa dauka, eta 50 kiloko txingak erabiliko ditu esku bakoitzean. Orain bi urte 6 plaza eta 17 metro egin zituen eta marka hori hobetu nahi du.

2018/08/11 19:00

Sunbillako frontoia Malerreka Sunbilla

Ekitaldi gehiago »»

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa