Gazteluko hilerrian lurperatze duina izan du Sagardia Goñi familiak

Ttipi-Ttapa/Xorroxin 2017ko ira. 4a, 08:29

Juana Josefa Goñi eta bere sei seme-alaben hezurdurak hilerrira eraman zituzten, bertan hobiratzeko.

Duela 81 urte, Juana Josefa Goñi 38 urteko gazteluarra eta haren sei seme-alabak desagertu ziren. Legarrea leizean amilarazi zituztela zioten zurrumurruek, baina isiltasuna nagusitu zen joan den urtera arte. Familiak gordetako memoriak, Jose Mari Esparza historialariaren ikerketak eta Aranzadi zientzia elkartearen lanak leizetik egia azaleratzea lortu zuten. Iaz, urriaren 12an, atera zituzten Legarrea lezetik duela 80 urte hara botatako Juana Josefa Sagardia Goñi eta bere sei seme-alaben azken hezurdurak eta larunbatean, irailaren 2an, Sagardia Goñi familiak merezitako omenaldia jaso zuen.

Donamaria-Gazteluko Udalak, Nafarroako Gobernuaren laguntzaz antolatu zuten ekitaldia eta Legarreko zuloan oroigarria inauguratzeaz gain, Josefa Sagardia Goñi eta bere sei seme-alaben gorpuzkiak hilerrian lurperatu zituzten. Goizean, 10:30ean, leizearen sarreran jarri duten oroitarria inauguratu zuten; ondotik, Gazteluko plazan, senideei eman zizkieten aztarnak. Ekitaldian izan ziren, bertzeak bertze, Ana Ollo Nafarroako Gobernuko Herritarren eta Erakundeen Harremanetarako kontseilaria eta Isabel Elizalde Nekazaritza Garapenerako kontseilaria. Omenaldiaren ondotik, hilerrira eraman zituzten gorpuzkiak, eta bertan hobiratu.

Gizartea Malerreka Donamaria

Erlazionatuak

Sagardia-Goñi familiari omenaldia

Ttipi-Ttapa 2017 ira 04 Malerreka Donamaria

Joan den larunbatean Sagardia-Goñi familiari egindako omenaldi ekimenaz, Mikel Iriarte Donamariko Udaleko zinegotziarekin solastu gara.

Xorroxin irratia 2017 ira 04 Malerreka

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.

Egin TTIPI-TTAPAren lagun