Goizeko 11etatik eguerdiko ordubatetara bederatzigarren ahari lehiaketa egin da Merkatu Plazan. Lehiaketa honetan, Malerrekako latxa arrazako ahariek parte hartzen ahal dute eta aurten 15 buru aurkeztu dira lehiaketara. Lehiaketa ahari mutur gorri eta mutur beltzendako irekia bada ere, zenbait edizioetan gorriak bakarrik agertu dira. Aurten, berriz, 4 ahari muturbeltz eder aurkeztu dira. Horien artean, Donamariko Zabalteneko Joxe Mari Indak aurkeztutako hiruek osatu dute podiumeko hiru koxkak, 10, 70 eta 50 euroko sariak eskuratuz. Laugarren, Urrozko Eustasio Mariezkurrenaren burua izan da.
Mutur gorrien atalean, 11buru aurkeztu dira eta diru-kopuru bera izan dute saritzat hiru lehenbizikoek. Lehenbiziko saria Donamariko Porotxeneko Jose Miguel Lasagak aurkeztutako ahariarentzat izan da, bigarrena Oizko Telleneko Lucio Telletxearentzat eta hirugarrena Doneztebeko Koro Antxorenarentzat.
Xanti Uterga alkateak, Alfredo Basterrak eta Patxiku Mitxelenak osatu dute epaimahaia eta Leire Ortuoste zinegotziak ere parte hartu du sari banaketan.
Baina dena ez da ahari lehiaketa izan eta, eguraldia lagun, azienda feria polita gelditu da ortziral eguerdian, Martin anaiek eta Mikel Mendiburuk aurkeztutako behi eta aretxeekin. Gainera, Bordatxo aldeko aparkalekuan bildu dira dozena bat eskulangile eta Doneztebarrak elkarteko merkatariek ere beraien produktuak atera dituzte eta horrek lagundu du feria giroa ederragoa izan dadin.
