Oraingoan, omenaldi berezi bat eskaini nahi diote Sunbillakoak Ramon Latasari bere heriotzaren 25. urteurrenean. Horretarako, jaialdi dotorea antolatu dutesunbildarrek. Martxoaren 6an izango da Sunbillan. Lehenengo, 11:00etan bere oroimenez meza izango da eta segidan 12:00ak aldera, aizkora probak.
Eguraldiak laguntzen badu saioa Ramon Latasa plazan izango da eta euria eginen balu, udal pilotalekuan jokatuko da.
Hasteko, Latasaren garaiko aizkolari handienetako bat arituko da aizkoran; Patxi Astibia (73 urte), eta oinbiko enbor bat moztuko du. Ondoren, aizkora desafio berezia jokatuko dute Donato Larretxea aizkolari beteranoak eta Iker Vicente aizkolari gazteak. Donato Larretxeak, aizkoran erabiltzen diren neurri guztietako enborrak moztu beharko ditu, denetara, zazpi enbor; kanakoa (108 ontza), 80 ontzakoa, oinbikoa (72 ontza), (60 ontzakoa), kana-erdikoa (54 ontza), 45 ontzakoa, eta oinekoa (36 ontza). Oraindik inork ez du egin horrelako lanik plaza batean.
Iker Vicentek, berriz, 16 kana-erdiko ebaki beharko ditu.
Aizkolari bakoitzak bi laguntzaile izanen ditu ondoan: erakuslea eta botileroa. Bakoitzak bere enborrak plazaratuko dituzte, eta bi aizkolarien asmoa enbor onak eramatea da plazara. Biek ere omenaldia egin nahi diote Ramon Latasari, marka handi bat eginez.
Jaialdia ikusteko, gainera, ez da sarrerarik ordaindu behar izanen. Beraz, herri kirol eta aizkora zaleentzat, galdu ezin daitekeen hitzordua.
