[ARGAZKIAK] Aresoko XVII. Mendi Martxa: aldapan gora ere irribarrez

Aresoko Mendi Martxaren XVII. edizioak aurreikuspen guztiak hautsi zituen irailaren 6an. Mendizale kopuru handia espero zuten; aldez aurretiko izen emateak irailaren 3an itxi zituztenean 435 lagunek zutelako izena emana, baina ez ziren gutxi izan egunean bertan ere izena eman zutenak.  572 lagunek parte hartu zuten proban: 369 mendizalek osatu zuten 21 kilometroko ibilbide luzea eta 203k 12 kilometroko ibilbide laburra.

Goizeko zortzietan atera ziren plazatik ibilbide luzeko parte hartzaileak eta ordubete geroago ibilbide laburrekoak. Lehenagotik hasiak ziren lanean Aresoko herritarrak: ibilbidea markatu, plaza prestatu, aparkalekuak antolatu, kamisetak prestatu, izen emateak egin, kamisetak banatu... denera, 50 bat lagun aritu ziren auzolanean. Paella prestatzeaz arduratzen den taldeak ez zuen atseden handirik izan: bederatzi paella egin zituzten. Itzulia osatuta, kamiseta berria soinean eta tripa-zorriak asetuta egin zuten parte hartzaileek etxerako buelta.