Iluntzeko zazpiak jo baino minutu batzuk lehenago lehertu zen festa Leitzako plazan. Herriko musikariek eta abeslariek beraien kantuekin girotu zituzten aurkezpen ekitaldia hasi aurreko minutuak. Txalaparta doinuek seinalatu zuten hasiera eta segidan, Kristina Urrutia Nafarroako Iparraldeko Euskara Mankomunitateko teknikariak hartu zuen hitza. Berak egin zituen aurkezpenak eta hizkiak eskuan zituztela, banan bana oholtzara igoz, osatu zuten Euskaraldiko hamaikakoa. Hauexek dira ordezkariak:
Maider Amantegi: Leitzako Udaleko zinegotzia. Udalak apustu sendoa egiten du adiminstrazioa euskalduntzeko, langileak euskaraz aritzeko zein herritarrei zerbitzua euskaraz eskaintzeko.
Goretti Calderon: Amazabal institutuko zuzendaria, Hezkuntzaren izenean. Hezkuntza eskaintza osoa D eredukoa da Leitzan.
Martxel Intsausti: Kaxkabeltza Elkarteko merkatarien eta ostalarien izenean.
Jaione Olazabal: Aresoko ordezkaria, euskaltzalea. Herriko euskalgintzan eragile aktiboa, sustatzailea eta herriko zenbait egitasmo eta taldeetan parte hartzailea.
Mamen Uharte: Osasun Etxearen izenean. Osasungintzan euskaraz egin ahal izatea erronka bat izaten da, betiere, Nafarroako Osasunbidean. Zorionez, Leitzako osasun etxean euskaraz aritzeko aukera dute mediku, pediatra eta erizainekin. Eta herriko osasun etxean erreferente eta lider positiboa da Mamen, euskarari eusten diolako beti, eta euskaraz egitea eragiten duelako.
Iker Bengoetxea: Aurrera Elkarteko futbol taldearen ordezkari. Haur asko ari da Aurreran kirolean, eta kirola eta aisialdia euskaraz eskaintzearen garrantzia azpimarratu nahi izan dute.
Sharik Lopez: komertzioko langilea, leitzarra eta euskalduna. Ekuadortik etorritako gurasoen alaba, Leitzan jaio, hazi eta bizi dena.
Joxe Mari Baraibar: Leitzako Jubilatuen Elkarteko ordezkaria.
Maider Lopez: gurasoa, euskarara gerturatzeko ahaleginean ari dena. Leitza bezalako herri euskaldunean belarriak zorrotz behar dituzte euskara ez dakitenek, eta ahalegin hori aitortu nahi izan diete Belarriprestei.
Junkal Otxotorena: EHMendi Erronkaren izenean. Mendi Erronkak, kirola, nazioa eta lurraldetasuna ditu oinarri, euskara ardatz hartuta du.
Christian Perez: Leitzako harategi bateko langilea, kanpotik Leitzara bizitzera etorria eta euskara ez jakin arren, jarrera bikaina duena hizkuntzarekiko. Euskarazko hitzak ikasteko ahaleginaren ondorioz herritarrek erosketak euskaraz egin ditzakete berekin.
Gainera, aurten, Euskaraldiak apustu berezia egin du hitanoaren erabilera sustatzeko. Leitzaldean Pakita Zestau Leitzako Tardo baserriko etxekoandrea izanen da hikaldiaren ordezkari. Gazte-gaztetatik ikasi zuen hiketan aritzen, eta gaur egun oraindik hitanoari eusten dion emakumea da. Toka zein noka hitz egiteko gai da.
Beraiekin batera, Aitziber Olano eta Edurne Gomez ere igo ziren oholtzara, Ahobizi eta Belarriprest irudiekin. Aurkezpena bukatzeko, bertso eskolako ikasleek pare bat bertso abestu zituzten eta pintxoak banatu zituzten bertaratu zirenen artean.
Izena emateko epea zabalik
Maiatzaren 15etik 25era eginen dute Euskaraldiaren laugarren edizioa eta izena emateko epea irekita dagoela gogorarazi zuten atzoko ekitaldian. Izena ematea Internet bidez egin daiteke. Izena emateko orduan zehaztu beharko dute Ahobizi edo Belarriprest izanen diren eta hikaldian parte hartu nahi ote duten.