Arnas bidea. Bere ahizpa da proiektuaren sortzailea eta gonbidapena luzatu zionean ez zuen zalantzarik izan: «gaiari ikusgarritasuna ematea jende askorentzat lagungarria izanen zela pentsatu nuen». Oso prozesu polita izan dela dio, aberatsa oso: «dokumentalaren bilakaera eta horrek ekarri duen guztia, arnas bidea izan da niretzat». Bere burua hobeto ezagutzeko bidea ere eman dio: «emozioak identifikatu eta sentitzekoa. Bizipen eta esperientzia sakonak elkartrukatu ditugu; aberatsak bezain lagungarriak».
Ilusioa. Proposamena, minbizi metastasikoa diagnostikatu eta oso momentu berezian iritsi zitzaion eta dokumentala «gogoa eta ilusioa piztu dizkidan argitxo bat bezala izan da». Oso momentu bereziak bizi izan dituzte: «gogorrak, politak, baita dibertigarriak ere. Elkarrekin bihotza eta burua husteak asko lagundu dit. Besteek prozesua nola bizi duten entzun dugu eta elkarbanatu ditugun esperientziak konpartitzea, oso lagungarria izan da». Eta uste du egoera berean daudenei laguntzeko «aletxo bat» jarri dutela.
Betetako erronka. Ez zuen zalantzarik izan eta oso positiboa iruditu zitzaion hasieratik proposamena: «sufritzen dutenei edo haien gertukoei laguntzeko aukera bezala ikusi nuen». Maila pertsonalean, dokumentalean parte hartzea «oso erronka zirraragarria izan da, arduraz betetakoa». Bidean sentimenduak eta esperientziak partekatu dituztela azaldu du eta hor sortutako une ahaztezinak eta pasadizoak barruan iltzatuta gelditu zaizkiola: «hasieratik konektatu dugu eta emozioak beldurrik gabe azaleratu ditugu».
Taldearen babesa. Prozesua «oso berezia eta sakona» izan dela dio: «ohorea izan da beste lau lagunekin horrelako esperientzia konpartitzea». Aberasgarria ere bai, «norberarentzat, baina baita besteentzat ere. Gure antzeko egoera bizi duen norbaitentzat lagungarria izan daitekeela pentsatzeak asko pozten nau. Lantaldean oso giro polita izan dutela azpimarratu du: «elkar ulertu eta giro goxoan aritu gara». Amaiak emandako aukerarekin, «oso pozik eta eskertuta» dago, «egiten dituen lan guztiak ederrak izaten dira eta oso pozik nago lortutako emaitzarekin».
Zama arintzea.«Bidean sufrimendu eta momentu gogorrak dauden arren, familia eta lagunen berotasunarekin aurrera egiten dela erakustea, oso aberatsa izan da niretzat». Dokumentalak beraien bizipen pertsonalak azaleratu eta konpartitzeko aukera eman die, barruko korapiloak askatzekoa. Arazo edo konplexuak txikitzeko bidea izan da hori: «daukagun motxila txikitzekoa. Hunkigarria izan da Amaiak izan duen keinua, laguntzeko borondatea, gutaz horrela arduratu eta zaintzea. Bihotzez eskertu nahi nioke egiten ari den guztia».
