Azaldu dutenez, jangelaren aferan, «gorabehera ugari izan dira azken urteetan. Gainera, herri batetik bestera eta urtetik urtera prezioan alde izugarria dago eta zerbitzuaren kalitatea ere gutxitu da». Orain arte, ezer gutxi zegoen beraien esku, baina Foru Dekretu berri bat onartu dute eta horrek, 2025-2026 ikasturtetik aurrera, eskola komarkaletan jangelak tokiko erakundeen bidez kudeatzea ahalbidetuko du. Aukera hori baliatu nahi dute: «herrian bertan kudeatu eta zaintza erdigunean jarriko lukeen jangela eredu bat martxan jartzeko».
Horretarako, lantalde ireki bat sortu dute: «eskolako zuzendaritzako kideak, guraso elkartekoak, udalekoak, Zaindu Leitzaldekoak eta jangelako langileak elkartu gara». Datozen hilabeteetan alternatiba bat landu nahi dute: «Zaindu Leitzaldeak jangela kudeatzeko aukera jarri dugu mahai gainean, irabazi asmorik gabeko proiektua litzateke eta gurasoak bazkide izanen ginateke». Elkarrekin hartuko dituzte hainbat erabaki: «menua, zaintza eredua, zaintzaileen lan baldintzak... oreka bilatzen saiatu behar dugu, proiektu duin bat egiteko». Bideragarria dela ikusiko balitz eta familiek hala nahiko balute, jangelaren kudeaketa bere esku uzteko eskatuko lioke Leitzako Udalak Nafarroako Gobernuari.