Topaketa hauen sorburura jotzeko, berrogei urte egin behar dira atzera: 1983an egin zituzten Euskadiko Lesbianen lehenbiziko topaketak. Gerora, borrokak bere bide propioa egin duela nabarmendu dute antolatzaileek: «lorpenekin, testuinguruko aldaketekin, bolleraren subjektuaren berrikusketekin», baina oraindik bada zer landu eta hobetu: «jasaten ditugun zapalkuntzen aurkako borrokek beharrezkoak izaten segitzen dute». Testuinguru horretan, iaz Orion lehenbiziko bilera egin zuten, azaroan Gasteizen aurretopaketak eta hari horri eutsi eta tiraka, heldu dira apirilean Leitzan eginen dituzten topaketetara.
Bidean ikusi dute bollera eta nortasun disidenteek ezinbesteko beharrak dituztela: «barne-kanpo berrikusketarako, saretzeko, behar eta kezkak erdigunean jartzeko, aliantzak sortzeko, erronka eta generazio berriei ateak irekitzeko...». Topaketetan horretarako aukera izanen dute: «baita borrokan eta mugimenduan segitzen dugula berresteko ere».
Euskal Herri osoko 300-500 lagun inguru biltzea aurreikusi dute: «toki eta belaunaldi desberdinetako jendearengana heltzeko ahalegina egiten ari gara». Egitarau anitza osatu dute: «bertso saioa, tailerrak, hitzaldiak, karaokea, proiekzioak, performantzeak, arte sorkuntzak… izanen ditugu».
Hitzaldi nagusia subjektuari buruzkoa izanen da: «hainbat hizlari egonen dira, bollera subjektuaz hausnarrean, orain arte egindako bidea aitortu eta bollera identitateak gaur egun barnebiltzen duenaz aritzeko». Jai giroari ere tartea eskainiko diote: «testuinguru cisheterozentratu batean festarako ez ditugulako nahi beste espazio seguru». Antolakuntza lanak errazteko apirilaren 12a baino lehen izena emateko eskatu dute.