Topaguneak sortuz eta elkarlanak bultzatuz, Larraun-Leitzaldeko tokiko ekonomia garatzea helburu duen proiektuaren baitan, joan den astean abiatu zuten parte-hartze prozsua Leitzan, eta Mikel Zabaleta Leitzako alkateak TTIPI-TTAPAri kontatu dioenez, «hasiera txukuna» izan zuen. Are gehiago, «30 lagun» bildu zirela, eta «oso ekarpen interesgarriak» jaso zituztela adierazi du. Guztira zortzi saio egitekoak dituzte eta gaur eginen dute bigarrena, hau ere Leitzan, 15:00etan. Hirugarren sektorekoei eta herriko interesdunei egin diete parte hartzeko deia eta izena emateko mimukai@cederna.es helbidera idatzi beharko da.
Parte-hartze prozesuko hurrengo saioak:
- Martxoaren 4an, Leitzan, hirugarren sektorea eta herritar interesdunak.
- Martxoaren 11n, Jauntsaratsen, lehen sektorea eta herritar interesdunak.
- Martxoaren 17an, Lekunberrin, lehen eta hirugarren sektoreak eta herritar interesdunak.
- Martxoaren 24an, Lekunberrin, bigarren sektorea eta herritar interesdunak.
- Apirilaren 15ean, Leitzan, bigarren sektorea eta herritar interesdunak.
- Apirilaren 22an, Goizuetan, udal ordezkariak.
- Maiatzaren 6an, Leitzan, saio irekia.
