Urteroko zerbitzua emateko asmoz, udako denboraldiarako prestaketa lanetan gogotsu aritu dira, baina Covid-19ak sortutako ezohiko egoeraren ondorioz, azkenean udako igerilekuko zerbitzua bertan behera utzi behar izan dute. Kaleratu berri duten oharrean adierazi dutenez, Gobernutik jarritako irekiera balditzak oso zorrotzak dira «eta argi dago berriz ere herrietako kirol instalakuntza txikiek ezarritako arau hauek betetzeko zailtasun gehiago ditugula». Baldintza horiek guztiak gaindiztea lortuta ere, «zuhurtziaz eta arduraz jokatzea» erabaki dutela gaineratu dute: «ez dugu ikusten %100ean herritarren segurtasuna bermatu dezakegunik».
Herriko osasun etxeko profesionalei ere eskatu diete balorazioa egiteko eta hauek ere zerbitzua ez eskaintzea gomendatu diete. Hau guztia dela eta, 2020ko udan Leitzako udal igerilekuak ez irekitzea eta zerbitzurik ez ematea erabaki dute.
Datorren asteetan, legeak uzten duenaren arabera, herriko kirol zerbitzuak (kiroldegia eta pilotalekua) martxan jartzeko ahalegina eginen dutela ere adierazi dute. Eskerrak ere eman nahi izan dizkiete herritarrei «egiten ari diren esfortzu eta ahaleginagatik».