Saria jasotzerakoan eskerrak eman eta herritarren inplikazioa nabarmendu dute udal ordezkariek: «proiektu honetan Goizuetako eta Aranoko eragile sozial guztiak inplikatu dira. Modu kooperatiboan lan egin dugu, bakoitzak beretik emanaz eta esperientziak trukatuz. Guretzat hori da lan egiteko modu bakarra». Proiektu honekin izan dituzten emaitzekin gustura daude eta gaineratu dute: «lan honek bere emaitzak eman ditu, baina garrantzitsuena prozesuan sortu diren harremanak dira».
Erakunde saritua
Leitza, Goizueta, Areso eta Aranoko Oinarrizko Gizarte Zerbitzuen Mankomunitateak datorren urtean beteko ditu 30 urte. Lau herrietako bizilagunen bizi-kalitatea eta ongizatea bermatzeko helburuarekin sortu zen eta gaur egun, profil profesional ezberdineko hamabost langile ari dira bertan lanean. Hasieran, harrera eta gizarte-orientazioa eskaintzen zituzten, baina egun, doako zerbitzu publikoa eta komunitarioa eskaintzen dute: tartean, norberaren autonomia sustatzeko programa eta mendekotasun-egoeran aurkitzen diren pertsonak artatzeko eta gizarteratzeko programak.
