Azaroko kultur egitarau zabalaren baita, larunbat honetan, azaroaren 23an, Arnasa gara ekimenaren barne, Kartzela serie digitalaren aurkezpena eginen dute Goizuetan. Eskolako Jangelan zehaztu dute hitzordua, larunbatean 19:00etan.
Arnasa gara ekimenaren barrenean, Hiru Damatxo ekoiztetxea arduratu da Kartzela serie digitala egiteaz. Zazpi atal izanen ditu eta kanpainaren elementu berritzailea izango da. Bertsolari Txapelketa Nagusiaren ostean BECen harrapatuta dauden sei lagun dira istorioaren protagonistak, eta arnasguneetako herritarrak dira guztiak: Iratxe Urkiaga (Lekeitio), Sambou Diaby (Zumaia), Juanen Saralegi (Lesaka), Erika Olaizola (Azpeitia), Amaiur Epher (Donibane-Garazi) eta Ainboa Etxebarria (Ondarroa). BECeko zenbait tokitan harrapatuta gelditu ondoren, pixkanaka topo egingo dute elkarrekin, eta eraikinetik nola atera pentsatzen hasiko dira. Izaera eta jatorri desberdina duten sei lagun dira.
