Joanes Illarregik larunbatean jokatuko den hirugarren final aitzinekoan kantatuko du

Igor Menika Bengoetxea ariko da gai jartzaile lanetan, eta sei bertsolari hauek ariko dira kantari: Agin Laburu Rezola, Aitor Bizkarra Ruiz, Aitor Mendiluze Gonzalez, Ane Labaka Mayoz, Aner Peritz Manterola eta Joanes Illarregi Marzol (Leitza, 1999). 17:00etan hasiko da saioa, Jai-Alai pilotalekuan. 

Dagoeneko sarrerak bukatu dira, baina sarrerarik gabe gelditu direnek Bertsoa.eus atarian, ETB2ON katean eta ETB ON plataforman ikusteko aukera izanen dute. 

Hurrengo saioak

Bi itzuli edo buelta izanen ditu final aitzineko faseak: lehenbizikoan, lau final aitzineko jokatuko dituzte eta hiru bigarrenean. Hain zuzen, lehenbiziko bueltako azken saioa izanen da larunbatean, azaroaren 7an, Gernika-Lumon eginen dutena. Hurrengo saioa, berriz, Miarritzen izanen da, azaroaren 14an.

Bigarren bueltako saioak, berriz, azaroaren 21ean Donostian, azaroaren 28an Gasteizen eta abenduaren 5ean Bilbon eginen dituzte. Lehenbiziko itzulian puntu guttien bildu dituzten 24 bertsolarietatik seik bigarren bueltan kantatzeko aukera galduko dute. Oraingoz, Amets Arzallus Antiak (Hendaia-Sara, 1983) eta Nerea Ibarzabal Salegik lortu dute bigarren buelta horretara sailkatzea, Larraun-Lekunberriko eta Eibarko final aitzinekoak irabazi dituztelako. Hala, Arzallusek abenduaren 5ean Bilbon eginen den saiorako txartela eskuratua du eta Ibarzabalek azaroaren 28an Gasteizko saioan kantatuko du. 

Azaroaren 14an Miarritzen

Ainhoa Larretxea Agirre beratarrak gidatuko du saioa, eta sei bertsolari hauek ariko dira:

• Andoni Rekondo Izagirre
• Julio Soto Ezkurdia
• Maddalen Arzallus Antia
• Maddi Ane Txoperena Iribarren (Hendaia-Lesaka, 1994)
• Oier Etxeberria Zubimendi
• Sustrai Colina Akordarrementeria

Final aitzinetako orain arteko sailkapena

Lehenbiziko itzulitik bigarrenera zuzenean sailkatutakoak:

• Amets Arzallus Antia
• Nerea Ibarzabal Salegi