Euskal Artzainak Ameriketan elkarteak antolatutako hondarreko besta eguna eginen dute irailaren 27an Lesakan, Ohore zuri euskal artzaina, ohore zuri atta! lelopean. Hain zuzen, lehenbizikoa ere herrian egin zuten duela hogei urte, 2006an, eta igande honetako azken bestarekin borobildu nahi dute ibilbidea. Laura Igantzi Mitxelena, elkarteko sortzaile eta presidenteak, agurreko besta honetan omenaldia eskaini nahi die gurasoei, «beraiek izan direlakoz lan hau egitera bultzatu nautenak».
Irailaren 27ko egitaraua
10:00etan ongi etorria eta hamaiketakoa plazan. 10:00etatik 11:45era txaranga, zaldunak, karro kanpoa… 11:45ean mezara ezpata dantzari ttikien gibeletik. 12:00etan Meza, Lesakako Abesbatza, Menditarrak eta Erramun Martikorenarekin. 13:15ean Ezpata dantzariek Zubigainekoa dantzatuko dute, txistulariek lagundurik. 14:00etan high ball eta bazkaria pilotalekuan, Menditarrak eta Erramun Martikorenarekin. 19:00etan bukaera.
Hogei urteko zikloaren bukaera
Aurtengo ospakizunak 20 urteko ziklo baten amaiera markatzen du; garrantzi handiko ekitaldia izan da, eta data seinalatua artzain aunitzen eta haien familien egutegietan. Aurtengo topaketa ere arreta handiz prestatu dute, eta elkarteak bermatu nahi du denek oroitzapen zoragarriak eramatea eta eguna merezi duten moduan gozatzea; izan ere, «haien lan gogorra eta Ameriketan utzitako arrasto positiboa omentzeko diseinatutako eguna da. Herrialde horrek aintzat hartu du lan gogorrean, konpromisoan eta zintzotasunean, hitza betetzean, oinarritutako ondarea. Jatorrizko lekuetatik milaka kilometrora egonda ere, tradizioak, hizkuntza eta kultura maite dituen herri baten irudia islatzen du horrek», aipatu digu Laura Igantzik.
