Alde batetik, usategietara joateko Orainbenta-Atxuria oinezko ibilbide zaharra homologatu dute aurten; «11,5 kilometroko bidea da, herritik abiatzen dena Usategietaraino eta buelta. Markatzea udazkenerako prest izanen da».
Bertzetik, Lizarietako Naturaren eta Hegazki Migratzaileen Zentroak irekia segituko du asteburuetan. «Etxalarko natura eta kulturari buruzko informazio daukagu bertan, baita Lizarietatik pasatzen diren hegazti migratzaileen inguruko informazio osatua. Gainera, usazaleek martxan segituko dute sarezko ehizarekin eta bisita gidatuekin. Urriaren 1etik azaroaren 20ra izanen da denboraldia».
Horrez gain, bi besta izanen dituzte herrian. Batetik «Lizarietan Tradizioaren Besta, irailaren 27an izanen dena. Egun horretan, Etxalarko eta Sarako udalek berresten dute usategietan Sarako lurrak erabiltzeko hitzarmena, eta paleta botatze txapelketa eta bazkaria eginen dute». Azkenik, «Usategietako igandea urriaren 18an izanen da. Bezperan giroa izanen da eta igandean Puro Relajo etorriko da herrira».