Matxinbeltzenea aterpetxetik adierazi dutenez, «hau ez da gertaera isolatu bat. Azken urteotan gero eta larriagora doan joera da. Orain arte hain helburua hemen ostatua hartzen zuten haur taldeei mugatzen zen eta urez betetako globoak edota loreontziko loreak edo lur puskak erabiltzen zituzten. Azkeneko asteburu hauetan muga bat gainditu dute: globoetatik harriak erabiltzera eta haurrak molestatzetik ostatuan den nor-nahi erasotzera pasatu dira. Muga guztiak gainditu dituzte».
Idatzian diotenez, «pentsatu une batez kanpotik Lesakara gozatzera edo atseden hartzera datorren jende horrengan: zer nolako beldurra edo babesgabetasuna sentituko ote zuten gau erdian euren aterpeari eraso egiten zioten bitartean? Nola sentituko ginateke gu geu edota gure seme-alabak kanpora joan eta horrelako tratua jasoko balute? Ezin dugu onartu gutxi batzuen jarrerak Lesakaren irudia zikintzea eta herritar zein bisitarien segurtasuna arriskuan jartzea».
Matxinbeltzenea aterpetxetik dei egiten diete nerabe horien gurasoei, herritarrei eta erakundeei «egoera honen aitzinean enpatiaz jokatu eta neurriak har ditzaten. Bakean eta errespetuan bizitzea dugu helburu; ez dezagun onartu eraso gehiagorik».