Egitaraua
Heldu den urtetik aitzinerakoak noiz egiten diren erabaki baino lehen, azienda erakusketarik eta lehiaketarik gabekoak izanen dira aurtengo feriak. Gainerakoan, ohiko egitaraua izanen dute. Azaroaren 19an, asteazkenean, Merkatu Eguna izanen da. 18:00etan Lesakako Trikitixa Taldearen kalejira eta Beti Gazte elkarteak antolatutako ajoarriero lehiaketa izanen dituzte Beheko Plazan.
Baina egun handia, azaroaren 20a, ortzeguna izanen da. Goizetik hasita, eskulangileen erakusketa izanen da Beheko Plazan. Ohi denez, eskualdeko ikastetxeek beraien ikas bidaietarako edo elkartasun helburuetarako postuak ere paratuko dituzte, 11:00etan herri kirol erakustaldia eginen dute Plaza Zaharrean. Ondotik, bertso saioa izanen dute. Kioskotik kantari ariko dira Xabat Illarregi Marzol leitzarra eta Miren Artetxe Sarasola.
Pilota jaialdi berezia
18:00etan pilota partidak jokatuko dituzte udal pilotalekuan. Lehen partidan, Umore Onako Alize Sagardui goizuetarra eta Arkupeko Joana Iratzoki igantziarra, Arkupeko Amaiur eta Ainitze Martinez Lesakako ahizpen kontra ariko dira. Ondotik, Garfe enpresa profesionalaren eskuz binakako III. Openeko finala jokatuko dute Pradok eta Merino II.ak, Ugaitz Elizalde iturendarraren eta Arbizuren kontra. Ordu berean, dantzaldia hasiko da Plaza Zaharrean, Imanol Intxaustiren eta Imanol Larrañagaren eskutik. 19:00etan Beti Gazte Kantari Alondegiko arkupetan.
