Asteburuan hasitako kultur egunetako hitzorduei, atzo eman zieten segida aranztarrek, eta sukaldaritza tailerra egin zuten.
Larunbatean, berriz, azaroaren 1ean, Ekaitza Elkarteak antolatuta, XXIX. aldiz Baserritarren Eguna eginen dute. Goizean goizetik, herritarrek salmentako eta erakusketako postuak paratuko dituzte frontoian: baratzeko eta baserriko produktuak, eskulanak, argazkiak, postreak, opilak... Ostatua ere izanen da jatekoarekin eta edatekoarekin, eta 11:00etan gazta lehiaketa hasiko da frontoian bertan. Horrez gain, herriko trikitilariak eta pandero jotzaileak herrian barna eta frontoian ibiliko dira eta Ekaitza Elkarteak txartelak salduko ditu, gazta lehiaketako sari banaketaren ondotik, bertako produktuekin osatutako zarearen zozketa egiteko.
Arratsaldean, berriz, Auskalo zeinek jarriak bertso emanaldia eginen dute Unai eta Eñaut Agirre bertsolariek eta Imanol Kamio musikariak. 19:00etan eskolako gimnasioan izanen da.
Antzerkia
Azaroaren 2an, Txalo-Talo antzerki taldeak Kutsidazu bidea Ixabel helduentzat antzerkia eginen du, 18:00etan eskolako gimnasioan.
Liburu aurkezpena
Azaroaren 7an, kultur egunak borobiltzeko, Esnatu ala hil liburua aurkeztuko du Gari Goikoetxeak, 19:00etan liburutegian.