Margolan digitala
«Ezpata dantzarien arroparen koloreetan oinarritzen den margolan digital» gisara definitzen du berak aurkeztutako Kruzik lana. «Pertsona irudikatu gabe jantzien, eta hauen koloreen mugimendua kruzeak egiterakoan nola den irudikatzen saiatuz. Ezpata dantzaria da Lesakako sanferminetako folklorearen ikur esanguratsuena, egia da gehienetan ezpata dantzariak protagonista izaten ditugula kartel eta azal lehiaketan, horregatik, iaz arratsaldeko dantzarien kartela aurkeztu nuen, bigarren plano batean gelditzen diren dantzariei protagonismoa emateko. Aurten, aldiz, janzkera erdigunean paratzen saiatu naiz». Tantirumairu Euskal Folklore taldeko dantzari ere bada eta aipatu digunez, «ttikitatik ikasi dugu gure jantziek dantzan duten garrantzia. Hau dantzatzen ez duten baina josten eta arropak prestatzen ibiltzen diren emakumeen lanari esker lortu da. Hauei esker erraten ahal dugulako Lesakan hau aunitz zaintzen dugula, dantza taldearen eragina sanferminetatik olentzero eguneko lehiaketara hedatzen delako, eta nabaria da». Berari ere gustatuko litzaioke ezpata dantzari ateratzea San Fermin egunean, «edozein lesakarrentzat ttikitatik izan duen ilusioa dela erranen nuke eta dantzaria izateak hori areagotzen du».
Urteko aste politena
Sanferminetakoa urteko aste politena da Imanol Mesarentzat, «jaio nintzenetik xuri gorriz jantzi naute eta jantziko naiz urte luzez seguraski. Uztailaren 6a da gehien gustatzen zaidan eguna, herritarren painulua jartzeko gogoak goizean, danborren hotsa arratsaldean, besta, gosaldu eta ezpata dantzariak elizara igotzen ikustea ondotik... Zerbait hobetzekotan, herritar batzuen parte hartzea izanen zen, txosnak antolatzen, bazkariak…».
Irrintzi peñako kide da Imanol Mesa eta «6arekin batera, 8a egun politenetakoa da niretzat. Goizean peñen danborradarekin hasten dut eguna, gero plazako balkoitan txaranga aditu eta bazkaltzera joaten gara. Arratsaldean peñen bajadarekin, eguraldiak laguntzen badu, pixka bat busti eta besta egitera». Lesakako bestak bukatuta, uztailaren 11n egun bateko atseden hartuko du, baina 12an eta 13an berriz ere txuriz jantzi eta Iruñean izanen da, «Fifi ta Fefa gisa pintxatzen, 12an Monton tabernan eta 13an Herri Sanferminetako txosnagunean».
Fifi ta Fefako Fefa
Izan ere, Fifi ta Fefa DJ bikoteko Fefa ere bada Imanol Mesa (Unax Ordoki da Fifi). Izen berezi horren gibelean, nolabaiteko omenaldi bat ere bada: «Bai, gu bion amatxiren goitizenak dira Fifi ta Fefa, Serafina Mazizior Fifi eta Josefa Tapia Fefa. Ez ditugu guk asmatu, herri guztiak deitzen ditu Fifina eta Fefa goitizenez, eta izenak antzekoak zirenez hau aukeratu genuen oraindik pintxatzen hasteko esperantzarik gabe ginenean». Fefak erran digunez, «denetik jartzen dugu giroaren eta orduaren arabera, batez ere gu besta egiten bagina jarriko genukeena. Euskal herriko panorama musikaleko artistak jartzen saiatzen gara gehienbat baina ez dizkiogu ateak ixten bertze erritmoei, gauden lekuko adin tarteari ere erreparatzen diogu aukeraketa egiteko orduan». Izenetik sortutako bikotea dela aitortu digu Fefak: «Izenetik sortu zen dena, izena okurritu eta Instagrameko kontua sortu genuen deus planteatu aitzinetik. Inolako seriotasunik gabe sortu zen, norbaitek kontaktatuko zigun ere pentsatu gabe. Baztango gaztetxeko kide den lagun batek idatzi zigun arte, ez genuen espero kontua sortu eta hilabete baino guttiagora inondik deituko zigutenik».
Geroztik, Euskal Herriko txoko aunitzetan ibilia dira dagoeneko, «Agurainen, Lazkaon, Gaintzan, Bilbon, Lezon, Baztanen, Leitzan... eta aitzinetik datozenak, Usurbil, Zarautz, Iruñea, Asteasu, Gasteiz…». Horien artean bat aukeratu beharko balu «lehendabizikoa» izanen zen, «Baztango gaztetxeak egin zigun harreragatik, etxean bezala sentitu ginen. Lehen lerro guztia gure kamixetez betea zegoen, lagunek sorpresa gisa egin zizkigutenak, hagitz polita izan zen». Eta non gustatuko litzaiekeen musika jartzea? «Edozein dela lekua gustura egoten gara, baina aukeratu ahal banu Gazteon Eskutik edo 40 Minutu Rock edo horrelako topaketaren batean adibidez».
