‘Eta zuk, Lesaka LGTBIQ+ pertsonentzat bizigarria dela uste al duzu?’ galderari erantzuna eman asmoz solasaldia emanen dute Eihera kooperatibako Kattalin Minerrek eta Iñi Etxezarretak maiatzaren 23an, ortziralean 19:00etan Lesakako Eskolttikin. Solasaldiaren ondotik pintxo potea eginen dute eta Fifitafefaren emanadia izanen dute Arrano ostatuan.
Ortziraleko solasaldia Lesakako udalak eta zenbait herritarrek egiten ari diren lanketa plazaratzeko lehen ekitaldi publikoa izanen da. Izan ere, Lesakako Udalak LGTBIQ+ fobiarik gabeko Nafarroako udalerrien sarean sartzeko eskaria egina du eta lanketa abiatua du. Ortziraleko solasaldia izanen da bidearen hasiera eta irailean bigarren faseari ekinen diote.
