Jendez bete ziren Altzate karrika eta Eztegara pasealekua haurren mozorroak ikusteko. Labiaga ikastolakoak ireki zuten desfilea eta erraldoien eta buruhaundien musikak eta arropak soinean. Gibeletik, Jesusen Bihotza ikastetxeko haurrak Cazafantasmas pelikulako protagonisten arropak eta mamuen maindireak soinean dantzan aritu ziren. Desfilea ixten, Ricardo Baroja eskolako lagunek Berako bestetako giroa islatu zuten txaranga doinuz eta blusak soinean.
Ttikienen desfilearen gibeletik, Inudeak eta Artzainak dantzan eta kantuan aritu ziren helduenak.
Arratsaldea borobiltzeko merienda banatu zuten Eztegara frontoian.