Herri batzuetan ospatu berria eta gainerakoetan egiteko puntuan ditugu inauteak. Eta horietako aunitzetan Ortzegun Gizen, Orakunde edo Egun Ttun-Ttun ospatuz eginen dute inauteriak heldu direnaren seinalea.
Baztanen Oilar Dantza izanen da herri batzuetan Orakunde eta bertzeetan Egun Ttun-Ttun deitua den eguneko ekitaldi nagusia. Horrez gain, ez da otordu, dantza eta jostetarik faltako.
Beran Ortzegun gizen goizean haurren zingar arroltze eskea eginen dute herrian barna. 15:45ean hasita, 3 eta 12 urte bitarteko ikasleen Inudeen eta Artzainen desfilea eta karrozak suhiltzaileen parketik hasita Eztegara pilotalekuraino. Ondotik, parte hartzaileendako merienda Eztegara pilotalekuan.
Lesakan, berriz, goizez arraultze-arraultze eskean ibiliko dira neska-mutikoak. Arratsaldean ikastolan inauteetako jaialdia izanen dute.
Etxalarren, berriz, goizean neska-mutikoak urtzain gizen kantatuz eskean ibiliko dira etxez etxe. 14:30etik aitzinera Landagain eskolako ikasleek beren antzezlanak eskainiko dituzte karrikaz karrika. Ondotik, haurrendako merienda Guraso Elkarteak emana.
Igantzin ere ospatu ohi dute Ortzegun Gizen eguna. Nahiz eta inauteak joan den asteburuan egin, eskolako haurrak eskean aterako dira eta arratsaldean, etxeetan bildutako puskekin, merienda izanen dute Biltokin.