Aldarrikapen horiek biltzen dituen honako idazkia plazaratu du Goldatzek:
Goldatzeko kideok landa eremuko emakumeon lana eta borroka aitortzeko aukera baliatu nahi dugu.
Elikagaiak ekoizteaz arduratzen diren emakume nekazari eta abeltzainak, etxeko ekonomia eta zaintzaz arduratzen diren etxekoandreak, bertzeen etxeetan zaintza lanetan dabiltzan etxeko langileak, osasun sistema publikoa bizirik mantentzeko ardura hartzen duten erizainak eta medikuak, bizitza autonomoak ahalbidetzen dituzten etxez etxeko zerbitzuetako langileak, zahartzaroa landa eremuan bizitzea ahalbidetzen duten zahar etxetako langileak, herriak bizirik mantentzen dituzten komertzio txikietako dendariak, eskola txikietako, haur eskoletako, ikastoletako eta eskoletako maistra eta hezitzaile konprometituak, euskaltegietan euskara irakasten dabiltzan irakasleak, lurraren defentsan jo eta su dabiltzan emakume militanteak, ondarea defendatzen eta biziraunarazten dabiltzan kultur militanteak, gure komunitateak feminismora bideratzen ari diren emakume ekintzaileak, kirola emakumeen gauza ere badela erakusten ari diren emakume kirolariak, landa eremuaren etorkizunaz arduratuko diren ikasleak.
Hauek eta bertze hainbertze gara landa eremua bizirik mantentzen dugun emakumeak. Hiritik eta hiriarentzat eraikitako jendarte eredu honi landa eremutik ematen ari garen alternatiba aintzat hartzeko eta erdigunera ekartzeko garaia da!
