Bestak larunbatean hasiko dira, uztailaren 20an, Alkaiaga Trail lasterketarekin. 17:00etan haurren lasterketa eginen dute. 14 urtetik beherako gazteek parte hartzen ahalko dute eta hiru kilometroko ibilbidea osatu beharko dute. Ondotik, 17:30ean hasiko da helduen lasterketa, zazapi kilometrokoa. Azken urteetan erreleboka egin badute ere, aurten, banakako lasterketa izanen da. Izen ematea aitzinetik egiten ahal da alkaiaga@hotmail.com helbidera idatzita, Zazpi euroko prezioa du, eta prezio horretan sartzen dira lasterketa ondotik banatuko duten bokata eta baita istripuen kontrako asegurua ere.
Lasterketaren ondotik, 19:00etan, botako dute suziria eta segidan Gure Txokoako dantzarien saioa izanen da. Hori bukatzean, Lesakako gaitariak ariko dira giroa berotzen. Eguna borobiltzeko 20:30ean erromeria izanen da Imanol Intxausti eta Iñaki Larrañagaren eskutik, eta atsedenaldian afaltzeko bokatak izanen dituzte.
Igandean gehiago
Biharamunean, uztailaren 21ean, igandean, izanen du segida bestak. 10:00etan pilota partidak izanen dira frontoian. Ondotik, 12:30ean auzoko meza eginen dute plazan, eta meza ondotik Ekhiñe Zapiain beratarra eta Josu Sanjurjo lesakarra ariko dira bertsotan.
Bertsolarien ondotik, auzotarren bazkaria eginen dute 14:30ean karpan eta Fer eta Beñat musikariak ariko dira giroa alaitzen. Bestak bukatzeko, zumba saioa eginen dute auzotarrek.