Ekitaldian irabazleak berak eta Ladis Satrustegi Lesakako alkateak hartu zuten hitza. Satrustegik nabarmendu zuenez, beka deialdiaren asmoa «herritarrek herriarekiko duten atxikimendua bultzatzea» da.
Ondotik bekaren irabazleak egindako lana aurkeztu zuen. Proiektua bertze hiru ikaskiderekin batera sortu duela azaldu zuen Ordokik, eta helburua herritik bertatik lortutako materiala patioan erabiltzea dela azaldu zuen, inolako kosturik sortu gabe. Proiektuan haurren beharrak erdigunean paratu dituztela azaldu zuen.
Herritarren artean inkesta eta elkarrizketak egin dituzte gaiaren inguruko ezagutza aztertzeko, eta praktikaldian, material berriztagarriak erabiliz 0 kostuko espazio bat sortu dute. Horrez gain, behaketa tresna bat sortu dute orain arte dauden eremuak mailakatzeko.
Ladis Satrustegi Lesakako alkateak nabarmendu du hasi berri den ikasturtean hirugarrenez deituko dutela beka. Beka deialdia abenduan edo urtarrilean eginen dutela azaldu du, eta oroitarazi du graduko edo masterreko edozein ikasketa egiten ari diren ikasleek aurkezten ahal dutela proiektua, beti ere Lesakarekin harremana badu.