Irailaren 17an, igandea, eginen dute Beti Gaztek antolatuko Lesakako BTT ibilaldia. Izen ematea irekia dago dagoeneko, eta aurten online bakarrik egin daiteke hilaren 15a arte.
Txirrindulariek bi ibilbide izanen dituzte aukeran. Ibilbide motzak 23,24 kilometroko luzera eta 770 metroko desnibela ditu, eta luzeak, berriz, 37,1 kilometroko luzera eta 1.414 metroko desnibela. Proba 09:00etan hasiko da Plaza Zaharrean. Prezioari dagokionez, Beti Gazteko bazkide eta federatutako txirrindulariek 12 euro ordaindu beharko dituzte, bazkideek eta federatu gabeek 15 euro, bazkide ez direnek eta federatutakoek 17 euro eta bazkide ez direnek eta federatuta ez daudenek, 20 euro. Dortsalak egunean berean hartu beharko dira plazan 08:00etan. Bizikleta elektrikoekin parte hartzeko aukera ere izanen da.