Bidasoa Ospitaleko proiektuaren kontra manifestazioa deitu dute abenduaren 11n Irunen

Gure osasunaren alde, SOS kirofanoak haunditu, berritu, hobetu lelopean Osasun Bidasoa Plataformak manifestazioa deitu du heldu den larunbaterako. Bidasoa Ospitaleko ebakuntza gelak berritu bitartean, Osakidetzak Donostiara bideratu nahi ditu ebakuntza guztiak, eta proiektu hori geldiarazteko eskatu du plataformak. Manifestazioa Irungo San Juan Plazatik abiatuko da, 18:00etan.

Joan den azaroaren 26an aurkeztu zuten Osasun Bidasoa Plataforma Bidasoa Ospitaleko atarian. Hainbat elkarte bildu dira plataforman, bertzeak bertze, «Bidasoa Ospitaleak herritarren behar teknikoak eta osasun premiak arta ditzan eskatzeko», eta horrekin batera, «ebakuntza geletan egin behar dituzten egokitze lanek iraun bitartean, herritarren osasun beharrei erantzuteko» eskatzeko, «pazienteen artean nahasmenduak eragin ditzaketen eta beharrezkoak ez diren lekualdaketak  saihestuz». Horrekin batera, «osasun langileen eskubideak errespetatzea» nahi dute, eta prozesu hau «Osakidetzaren, inguruko udalen, osasun langileen, sindikatuen eta herritarren parte-hartzearekin eta kolaborazioarekin» egin beharrekoa dela nabarmendu dute.

Bortzirietako ordezkariekin bilera

Bertzelako hainbat mugimendu ere sortu ditu proiektu honek. Change.org atarian, erraterako, sinadura bilketa irekia dute. Dagoeneko 4.000 lagunetik goitik egin dute obrek iraun bitartean ebakuntza gela guztiak ez ixtearen alde.

Bertzetik, Bidasoa Ospitaleko ordezkariak ortzegunean, abenduaren 9an, Bortzirietako udal ordezkariekin biltzekoak dira gaiaz solastatzeko.

 

Erlazionatuak

«Bidasoa Ospitaleko proiektu honekin paziente aunitzen bizia jokoan egon daiteke»

Bortziriak

Jose Ignacio KUTZ PEIRONCELY, Bidasoa Ospitaleko traumatologoa Bidasoa Ospitaleko ebakuntza gelak berritu bitartean, Osakidetzak Donostiara bidera...

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun