Bilkurako mozioen atalean gai bakarra izan zuten hizpide atzo arratsaldean Berako Udalean. Aitor Elexpuruk, Berako alkateak, Lesakako osasun zentroko Lehen Mailako Arretako Taldeak jakitera eman duen lan-prekarietateko egoeraren berri eman zuen. Alkateak jakitera eman zuenez «departamentuak ez ditu hainbat lanpostu bete: mediku lanpostu bat Lesakan; mediku lanpostu bat Landa Eremuko Larrialdi Taldean; pediatria lanpostu bat Beran, lanaldiaren %40an; administrari lanpostu bat Arantzan, %50ean eta larunbat goizetan; eta mediku errehabilitatzailea Lesakako kontsultarako». Azken hau «2020ko otsailaz geroztik bete gabe» dagoela oroitarazi zuen.
Gaia eztabaidatu ondotik, udalkideek aho batez «Lesakako osasun zentroko Lehen Mailako Arretako Taldearen aldarrikapenei» babesa eskaintzea eta akordio hau «Lehen Mailako Arreta Taldeari eta Lesakako Udalari» helaraztea erabaki zuten.
