Ruth Gonzalezek erran digunez, egoera ez da batere ona Berako San Jose zahar etxean. Kontuan hartu behar da zahar etxeetan dauden egoiliar gehienek, adinaz gain badutela berez gaixotasun edo ezintasunen bat eta, orain, Covid-19arekin kutsatu direnak, egoera bereziki larrian daudela. Gauzak horrela, Bortzirietako mediku-erizain guztien lehentasuna zahar etxeetan dago jarria momentu honetan. «Larunbatean eta igandean ere kontsulta pasatuko dugu bi zahar etxeetan eta asteburu honetan ez dugu atseden egunik izanen» gaineratu du Gonzalezek. Oraingoz 18 dira Berako zahar etxean positibo eman duten egoiliarrak.
Lesakako zahar etxeko gaixotuak egoera hobean
Zorionez, eboluzio hobea dute Lesakako zahar etxean positibo eman duten 13 egoiliarrek. Guztiak asintomatikoak dira eta horrek gauzak errazten ditu gaixoen segimendua egiterakoan.