«Leitzan bezala Bortzirietan ere baheketa masibo bat egitea osasun agintarien esku dago»
«Positiboen kopuruak goraka egin du Bortzirietako herri guzti-guztietan» dio Gonzalezek. «Oraingoz, bi pertsona daude ingresatuta eta baita hildako bat ere. Gainera, azken aste honetan ohartu gara goraka doala kasu klinikoen kopurua ere» gaineratu du, hau da «euren inguruan positibo ezagunik izan gabe, positibo eman duten pertsonak. Horrek erran nahi du birusa gure artean dabilela eta ez dagoela kontrolatua».
Alabaina, Bortzirietan bezala Nafarroako bertze hainbat tokitan ere goraka egin du positiboen kopuruak eta «PCRak eta segimenduen sistema osoa gainezkatua dagoela» ikusten du osasun eremuko zuzendariak. «Leitzan bezala Bortzirietan ere baheketa masibo bat egitea Nafarroako osasun agintarien esku dago, eta, momentu honetan, hemengo egoera berdintsuan edota zailagoan daude hainbat tokitan».
«Musukoa erabiltzeari eta distantzia sozialari dagokionez gutako bakoitzaren portaerak eragina du gure ondokoetan»
Garrantzitsua da jendea ohartzea «gutako bakoitzaren portaerak eragin ikaragarria duela gure ondoan dauden pertsonetan». Gonzalezek behin eta berriz errepikatzen du oharpen hori. «Burutik kendu behar dugu birusa eskolatik datorrela dioen ideia hori. Kutsadura, batez ere, familia giroan eta lagun kuadrillatan ari da gertatzen. Garrantzitsua da jendea horretaz ohartzea. Covid-19ak bat-batean eragiten du, eta 48 ordutan ongi egotetik hiltzeraino eraman zaitzake. Eta ez hori bakarrik, badira ondorioekin gelditu diren pertsonak ere».