Bi hilabeteko geldialdiaren ondotik, berriz ere hilabeteko bigarren larunbateko merkatuari ekinen diote Beran, beharrezko segurtasun eta osasun neurriak zorrotz betez. Maiatzaren 9an, larunbatean 10:30etik 13:30era eginen dute Beralandeta parean.
Postuak igarobide baten bidez bereizita egon beharko dira, eta horrek markatuko du merkatuko erabiltzaileen joan-etorria, sartzeko gune batekin eta irteerako bertze batekin, argi eta garbi bereizita.
Postuen arteko gutxieneko distantzia, aurrekaldean, gutxienez sei metrokoa izango da, eta alboen artean gutxienez lau metroko tartea utzi ahal izango da.
Postu beraren barruan, saltzaileek bi metro inguruko distantzia gorde beharko dute beren artean, eta jarduera komertziala erosle bakar bati mugatuko zaio, lanpostuaren neurriek bereizketa fisiko hori egitea ahalbidetzen ez badute. Era berean, bi metro inguruko tartea utziko da saltzailearen eta erabiltzaileen artean.
Debekatuta egonen da autozerbitzu moduan saltzea, eta bezeroek salgai dauden produktuak ukitzea saihestuko da.
Saltzaileek higieneari buruzko arau orokorrak bete beharko dituzte, hala nola: ilea bildua eta/edo txanoa; azkazal laburrak eta zainduak; eraztunak, eskumuturrekoak, eskumuturreko erlojuak eta gisakoak saihestu; salmenta bakoitzaren ondotik eskuak edo eskularruak desinfektatuko dira, gelarekin edo soluzio hidroalkoholiko desinfektatzailearekin, hala badagokio. Maskara erabiltzea gomendatzen da.
Saltzaileek eta erabiltzaileek erabiltzeko gel-desinfektatzaile banagailuak eduki beharko dituzte.
Erabiltzaileei dagokienez, udalerriko bizilagunak baino ez dira egonen. Edonola ere, horien arteko gutxieneko distantzia bi metro ingurukoa izanen da.
Udal ordezkariek baldintza horiek hasieratik azoka bukatu arte errespetatzen direla zainduko dute, eta, beharrezkoa izanez gero, sarbidea kontrolatu eta arautuko dute, bidegabeko sarbideak eta pilaketak saihesteko eta, ahal den neurrian, produktuak salerostea helburu ez duen edozein gizarte-kontaktu saihesteko.
Garbiketa eta bilketari dagokionez, merkatuak sortutako zaborrak poltsetan utzi beharko dira, garbiketarako eta zaborra biltzeko udal-zerbitzuek horretarako jarritako edukiontzien barrenean.
Jardunaldia amaitutakoan, jardueran erabilitako altzari, ekipamendu eta tresna guztiak garbitu eta desinfektatuko dira, hala nola balantzak, erakusmahaiak eta, oro har, kutsatuta egon daitekeen edozein azalera. Horretarako, ohiko produktu desinfektatzaileak erabil daitezke, hala nola lixiba-diluzio prestatu berri bat, gomendatutako kontzentrazioetan.