Covid-19ak eragindako osasun-krisiaren aitzinean, Lesakako Andra Mari egoitzak ekintza plan bat prestatu du izan daitezkeen kutsatze kasuak kudeatzeko, Nafarroako Gobernuaren Osasun Departamentuak emandako jarraibideei kasu eginez. Plan horren arabera, zentroak hiru plaza murriztu ditu, behar izanez gero isolamendurako erabiltzeko.
Normalean Lesakako suhiltzaile boluntarioek eta udal langileek egiten dituzten garbiketa eta desinfektatze lanez gain, Oronoz-Mugairiko suhiltzaile profesionalek ere garbiketa eta desinfektatze lan sakonak egin zituzten apirilaren 21ean.
Gainerakoan, egoitzaren funtzionamendua egonkorra dela jakinarazi dute Andra Maritik eta eguneroko jarduera normaltasunez garatzen dutela arlo guztietan: oinarrizko zainketak, elikadura, terapiak eta aisialdia.
Familiekiko komunikazioa ere egunero egiten dute, horretarako hainbat bitarteko erabiliz. Nabarmentzekoa da bideo-sistema bat paratu dutela, senideek eta egoiliarrek elkar ikusiz hitzegiteko aukera ematen duena.