Artxiboko irudiak

Antton Maiz pilotari handiari 1999an egindako elkarrizketa

Antton Maiz Bergara, pilota munduan Maiz II.a modura ezaguna, 1995ean erretiratu zen, 44 urte zituela. Lau urte beranduago Nerea Altzuri kazetariak bere baserrian, Petriseneko bordan, elkarrizketatu zuen. Pilota profesionala utzi ondoko bizimodua kontatu zion Ttipi-Ttapa Telebistari.

Maiz II.ak (Arantza, 1951.08.24) 1975eko ekainaren 24an debutatu zuen Tolosako Beotibar pilotalekuan eta 1995ean erretiratu zen, 44 urte zituela. Retegi II.ak eta biek dute esku huskako binakako txapelketa nagusi gehien irabaztearen marka, bortz alditan irabazi baitzuten. Maiz II.ak 1978an, 1981ean, 1983an, 1984an eta 1993an irabazi zuen. Horrez gain, 1980an buruz buruko txapelketa nagusian txapeldunorde izan zen, eta 1976an bigarren mailako buruz burukoa irabazi zuen.

Erretiratu zenean Asegarcek, bere azken enpresak, intendente izateko kontratatu zuen. Hala ere, istripuz bi orno hezur hautsi zituen, eta lan egiteari utzi behar izan zion.

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun