Bizipoza egitasmoa ezagutzera emanen dute Berako Kultur Etxean

Momentu honetan Euskal Herrian aritzen diren 35 elkartek osatzen dute Bizipoza.

Ortziralean 18:00etan dokumentalaren eta dokuwebaren aurkezpena eginen dute, hainbat gonbidatu berezirekin

‘Gure bizipoza, guztiona’ dokumentalaren eta dokuwebaren aurkezpen ekitaldia eginen dute otsailaren 7an, ortziralean 18:00etan Berako Kultur Etxean. Guztiok eta Bizipoza elkarteek antolatu dute ekitaldia, Berako Udalaren babesarekin.

Bizipoza zer den azaltzen duen emanaldia izanen da eta egitasmoa osatzen duten bi talderen dokumental ttikiak (Bortzirietako Guztiok eta Biak Bat) eskainiko dituzte, baita Bizipozarena ere. Estitxu Fernandez eta Anabel Arraizak aurkeztuko dute eta gonbidatu bereziak izanen dira, beraien elkartasun keinua eginez: Gure Txokoa dantza taldea, Julen Zelaieta, Joseba Irazoki eta Petti.

 

Bizipoza egitasmoa

Irabazi asmorik gabeko egitasmoa da Bizipoza. Izaera bereziko gaiak lantzen dituzten haur eta familien ongizatea helburu duten elkarteei laguntza afektiboa eta materiala eskaintzea du helburu. Eta aldi berean, elkarte hauek transmititzen dituzten baloreak jaso, hauekin aberastu eta hezi, eta hauek gizarteratuz herri inklusiboago bat eraikitzen saiatu.

Momentu honetan Euskal Herrian aritzen diren 35 elkartek osatzen dute Bizipoza (www.bizipoza.eus)

Hainbat ekimen burutzen dituzte urtean zehar baina azkeneko bi urte hauetan proiektu berri bat garatu dute: Dokuweb bat, non edukiak elkarteen inguruko mikro-dokumental txikiak diren, haur eta familia hauen istorio errealak. Eta honekin batera Bizipoza zer den azaltzen duen dokumentala ere.

Euskal Herri osoan zehar zabalpen lanak egiten dabiltza, elkartasuna, auzolana eta bizipoza bezalako baloreak gizartean euskaraz zabaltzeko. Lehenengo aurkezpenak hiriburuetan egin dituzte eta orain, eskualdeka eginen dituzte ahalik eta hedapen handiena hartu ahal izateko. Horietako bat izanen da Beran eginen dutena.

 

 

Erlazionatuak

Gure Bizipoza, Guztiona

Bortziriak Bera

'Gure Bizipoza, Guztiona' ekimenaren aurkezpena izanen da ortzirale honetan, Beran. Bizipoza elkarteko kidea den Anabel Arraizarekin mintzatu gara.

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun