Joxe Angel Zubiria lesakarrari azken agur hunkigarria egin diote Lesakan eta Iruñean

Iruñeko erraustegira eraman aitzinetik, goizaldean pasilloa egin diote ehunka lagunek bandera eta zaldiekin eta aurreskua dantzatu diote sorterrian

 

Abenduaren 27an, ortziralean erraustu dute Joxe Angel Zubiriaren gorpua Iruñean. Aitzinetik, azken agurra eman diote Lesakan bertan goizaldean. Albistur karrikako bi aldeak beterik, ehunka lagunek pasilloa egin diote. Hainbat herritatik etorritako adiskide eta lagunek, Zaldien Lagunak elkartekoek eta Ezker Abertzaleko kideek banderekin eta txaloekin agurtu dute. Aurreskua ere dantzatu diote.

Iruñean ere omenaldia egin diote Zubiriari, erraustegi atarian. Berriz ere Aurreskua dantzatu diote eta bertsoak, solasak eta musika ere izan dituzte, azken agur gisara.

Aski ezaguna

Olentzero gauak berri iluna ekarri zuen Lesakan. Joxe Angel Zubiria Leiza, 47 urteko lesakarra bat-batean hil zen. Aski ezaguna zen Zubiria, herri-lanean hainbat arlotan murgildua: inauterietan zakozarren kalejiran edo Fraindarrak taldearen erratz-eramaile, sanferminetako peñen danborradan laguntzaile, ferietan azienden garraiolari, zaldi-hezitzaile,… aitzineko agintaldian, zenbait hilabetez EH Bilduko zinegotzi ere izan zen eta aurtengo sanferminetan, lehen aldiz bandera dantzatu zuen. Berriki, bera zaldi gainean, bi lasterkariren kontra egindako apustuak ere zer errana eman zuen.

Erlazionatuak

Joxe Angel Zubiria lesakarrari azken agurra eskainiko diote ortzirale goizean

Bortziriak Lesaka

Iruñeko erraustegira eraman aitzinetik, ohorezko agurra egin eta aurreskua dantzatuko diote sorterrian

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun