Batzorde eta erakundeetako ordezkariak izendatu ditu Arantzako Udalak

Iñigo Sarrias izanen da lehenbiziko alkateordea eta Leire Mitxelena bigarren alkateordea

Ekainaren 21ean egindako bilkuran, agintaldi honetan udal ordezkariek izanen dituzten ardurak banatu zituzten Arantzan. Horrekin batera, udalbatzaren ohiko bilkurak hilabetero eginen dituzte. 

Hirigintzako zinegotzia Iñigo Sarrias izanen da; mendiaz eta auzolanaz Imanol Lukanbio arduratuko da eta kulturaz eta kirolaz Beñat Mitxelena. Ogasuneko zinegotzia Markel Jorajuria izanen da, baita ingurugiroaz, baserrigintzaz eta turismoaz arduratuko dena ere. Komunikazioko eta hezkuntzako arduraduna Joseba Pikabea izanen da eta euskara eta gizarte gaietako zinegotzia Leire Mitxelena.

Bertze organoetako ordezkariak

Bortzirietako Hiri Hondakinen Mankomunitateko ordezkaria Joseba Pikabea izanen da eta Gizarte Zerbitzuen eta Euskara Mankomunitateetako ordezkaria Leire Mitxelena.

Cederna Garalur elkarteko, Uraren Bailarak batzordeko eta Udalbiltzako ordezkaria, berriz, Dabid Iturria alkatea izanen da.

Osasun Kontseiluan Iñigo Sarrias ibiliko da, baita Animsarekin harremanetan ere, eta Eskola Kontseiluko, Pelle Ttikiko eta liburutegiko ordezkaria Joseba Pikabea izanen da.

UEMAko ordezkaria Imanol Lukanbio izanen da eta bere ordezkoa Beñat Mitxelena.

Ehiza batzordean, berriz, Dabid Iturria alkatea eta Beñat Mitxelena, Imanol Lukanbio, Joseba Pikabea eta Markel Jorajuria zinegotziak sartu dira.

 

TTIPI-TTAPA da Nafarroa Garaiko mendialdean dagoen euskarazko hamaboskari bakarra, eta zu bezalako irakurleen babesa behar du aitzinera egiteko.


Izan zaitez harpidedun