Ekitaldia hasteko, olerkia eta musika uztartu zituzten Iban Garrok eta Itziar Telletxeak. Ondotik, Bel Pozuetak hartu zuen hitza, plazan bildutakoen txalo artean. Nafarroan eta Lesakan sekulako erronka daukagula adierazi zuen eta lanerako ardatzak feminismoa, Skolae eta prekaritatearekin bukatzea direla. «Nafarroan erregimenari aurre egin behar diogu zuen bozarekin», aipatu zuen eta solasaldia bukatzeko, «Kataluniako eta euskal presoak etxean behar ditugula» erran zuen.
Arnaldo Otegi, EHBilduko koordinatzaile nagusiak mundu mailan bizi den krisi politikoaz, krisi klimatikoaz eta krisi ekonomikoaz aritu zen. Krisi horiei aurre egiteko, munduan, espainiar estatuan, Euskal Herrian, Nafarroan nahiz Lesakan bi bloke daudela ere adierazi zuen, «gauzak bere horretan mantentzearekin eroso dagoen bloke kontserbadorea eta ezkerreko pentsamendutik, jendartea aurrean jarriz, egoera aldatu nahi dugunon blokea».
Ekitaldia bukatzeko, EHBilduko zerrenda osatzen duten hamabortz lagunak atera ziren jendaurrera. Horien izenean, Ladis Satrustegi alkategaia eta zerrendan bigarren den Mattane Rodriguez solastatu ziren. Azpimarratu zutenez, egunotan Plaza Zaharrean duten lokalean herritarrekin aurpegiz aurpegi solasean ari dira, «migranteekin, gurasoekin, gazteekin… eta aunitz ikasten ari gara, herri honen premiei eta beharrei buruz». Datozen lau urteetan, «iritzi guztiak kontuan hartuz lan egin» nahi dutela azpimarratu zuten, «lesakar guztien etxebizitza eskubidea bermatuz, kultura sustatuz, oinezkoak protagonista izanen duen herrigunea indartuz». Turismo jasangarri, integral eta orekatua ere butzatu nahi dute eta alde horretatik, «herriaren eta Bidasoko Bide Berdearen arteko lotura segurua izanen den bide bat eginen dugu, Biurgaraien hasi eta Bereauraino joanen dena».
Hainbat herritar bildu zen plazan, baita, Bera, Etxalar eta Arantzako EHBilduko alkategaiak ere.