Bortzirietako Oinarrizko Gizarte Zerbitzuen Mankomunitateak antolatutako Bortzirietako Emakumeen Mendi Itzuliak hamargarren edizioa bete zuen igandean Lesakan eta adin guztietako ehun bat emakumek hartu zuten parte.
Bortzirietako emakumeek euri-langarrari aurre egin eta Lesakako plazatik abiatu ziren igande goizean, Frainerako bidean. Hiru ordu pasatxoko ibilaldia egin ondotik, berriz ere plazara itzuli ziren eta 'Berdintasuna gizarte osoari mesede egiten dion giza eskubidea da' zioen pankarta hedatu zuten, trikitixa eta pandero doinuekin dantzatzen hasi baino lehen. Datorren urteko mendi itzulia antolatzeko lekukoa Lesakako Nati Martikorenak eman zion Igantziko Joxepa Etxeberriari.
Ondotik, 30 bat emakumek Kasinoan bazkaldu zuten.
