Urtero bezala, Olentzero lehiaketako partaideak hiru mailatan banatuko dituzte: 10 urte arteko haurrak; 11 eta 15 urte artekoak eta 16 urtetik goitikoak. Jaiotzen lehiaketan, berriz, bi kategoria izanen dira: 10 urte artekoak eta 11 urtetik goitikoak. Sariak ere adinaren araberakoak izanen dira eta aurten bikoiztu egin dituzte. Erraterako, 600 euro izanen dute maila nagusiko irabazleek, baina talde guztiek izanen dute bere saria. Sariketara joan behar duten taldeak guttienez 6 pertsonakoak izanen dira eta bi abesti kantatuko ditu: bata, nahitanahiez “Olentzero buru haundia” eta bigarrena talde bakoitzak nahi duena. Talde bakoitzari, Olentzero, janzkera eta abestia, bat banaka puntuatuko zaio, eta puntuazio orokorra hiruren batuketa izanen da. Azken urteetan bezala, lehiaketatik kanpo ere parte hartzeko aukera izanen da, ondotik izanen den jaialdian. Parte-hartzaile guztiek bukatu ondoren, saridunen zerrenda jakinaraziko da, baina sariak ilunabarreko kalejiraren ondotik banatuko dira plazan. Saria jaso ahal izateko, Olentzero eta Jaiotza guztiak, Olentzero irabazlea izan ezik, karriketatik jasoak egon beharko dute. Kalejiran aterako den Olentzero irabazlearen kasuan, saria emanen da beti ere kalejira behar bezaka bukatzen bada, Olentzeroa osorik eta taldekideen janzkera lehiaketan aurkeztu den bezala.
Bertzalde, Olentzeroak xehetuz gero, biltzeak suposatzen duen kostua xehetu duen taldearen gain joanen da.