Fernando Etxegarai beratarrak 6 minutu eta 16 segundo behar izan zituen 50 koxkorrak biltzeko. Azken urteetan lortutako denbora onenetako bat, nahiz eta 2004an lortu zuen Euskal Herriko errekorretik 15 segundora gelditu. Arostegiko Imanol Kañamares izan zen bigarren (6:25), Iruñeko Aitor Blanco iazko txapelduna hirugarren (6:30), Berroetako Asier Gamio laugarren (6:39) eta Elizondoko kanporaketan denborarik onena lortu zuen Iruñeko Alis Alonso bosgarren (6:49).
Eskualdeko bertze kirolari beterano handi batek, Santiago egunean Elizondon berriz ere koxkor biltzen Nafarroako txapeldun suertatu zen Maika Ariztegi iturendarrak paratu zion txapela Fernando Etxegarairi.
Nafarroako Herri Kirol Federazioak antolatutako jaialdia osatzeko, Nerea Sorondo beratarraren eta Maika Ariztegi iturendarraren arteko aizkora saioa etxekoak irabazi zuen eta harri-jasotzen erakustaldia eskaini zuen Xabier Ariztegi Santxin etxalartarrak.
