Berrehun lagun baino gehiagok parte hartu dute Berako XI. Mendi Egunean

Ttipi-Ttapa 2018ko urt. 15a, 10:45
Santa Barbarako igoeran parte hartu zuten bikoteetako bat.

Santa Barbarako binakako kronoigoeran 51 bikote eta hirukote atera ziren

Arrakastatsua suertatu da aurten ere Berako Mendi Egunaren hamekagarren edizioa urtarrilaren 13an, Xabier Zubieta, Loro Pikabea eta Xabier Saralegi Taillon mendian hil zirela hameka urte betetzen ziren egunean. 

 

Larunbat goizean eskalada tailerra egin zen Toki Ona kiroldegian, eta 70 bat neska-mutikok parte hartu zuten, eskalada eta oreka ariketak eginez, rappel, boulder eta gisakoak. Arratsaldean, Santa Barbarara oinezko mendi ibilaldia eta binakako kronoigoera egin ziren eta Manttaleko haurrek lasterka ere egin zuten.

Arratsaldeko 3etan abiatu ziren oinezko mendi ibilaldian parte hartu zuten 50 bat lagunek eta Larretagainera joan ziren, korrikalariak animatzera pasatzerakoan.

5,5 kilometroko erlojuaren kontrako lasterketan 51 bikotek eta hirukotek hartu zuten parte. Rikardo Baroja eskolaren paretik minutuero atera ziren partehartzaileak eta jendearen animoak bildu zituzten ibilbide osoan. Ohikoa denez, lasterketa ez da konpetitiboa, baina bikoteen denborak hartu zituzten eta panel batean erakutsi. Horien artean, Manttaleko Asier Apezetxea aranztarrak eta eta Unai Santamaria hernaniarrak osatutako bikoteak lortu zuen denborarik onena (25 minutu eta 37 segundo). Partehartzaile guztiek 46 minutu baino guttiago behar izan zituzten ibilbidea osatzeko. Baina erran bezala, parte hartzea zen garrantzitsuena. Manttaleko korrikalari aunitz atera ziren proban.

Probaren ondotik, partehartzaileentzako berendua eskaini zen eskolako jangelan eta oparien zozketak ere egin ziren.

 

Pitxi Egillorren proiekzioa

Beranduago, Kultur Etxean, Pitxi Egillor mendizalearen ‘Pirinioak eta Himalaya artean’ proiekzioa eskaini zuten. Iruñean 1948an jaiotako mendizaleak Munduko mendietan izandako bizipenak laburbiltzen ditu emanaldi honetan. Pirinioetan egin zituen lehen gailurrak aurkeztu zituen eta ondotik, Andeak, Himalaya edo Karakorumera egindako espedizioak ere gogora ekarri zituen zuzeneko aurkezpen honetan.

Erlazionatuak

Berako XI. Mendi Eguna

Ttipi-Ttapa 2018 urt 15 Bortziriak   Bera

Publizitatea eta erakundeen dirulaguntzak ez dira nahikoa TTIPI-TTAPAren eta ERRAN.EUSen etorkizuna bermatzeko, eta zu bezalako irakurleen babesa behar dugu aitzinera egiteko.


Egin TTIPI-TTAPAren lagun