31. Gazta lehiaketako eta 20. Sagardo lehiaketako epaimahaiak ere lanean aritu ziren, azken hauek Karnesenean, Altzateko etxe historikoan.
Gazta lehiaketan hamahiru ale aurkeztu ziren eta horien artean, Lesakako Arteneko Jaxinto Otxotekok eraman zuen 220 euroko lehen saria eta Berako Bimitxeneko Eider Pikabeak bigarrena, 100 eurokoa. Biak ere lehen aldia dute ohorezko postu horietan. Azken urteetan ohiko garailea izan den Garmendiko bordako Sokorro Almandozek epaimahaiaren aipamena jaso zuen.
Sagardo lehiaketara, berriz, 14 botil sagardo aurkeztu ziren eta horien artean, Berako Leku-Ederreko Guillermo Perugorriak aurkeztutakoak eskuratu zuen 200 euroko lehen saria. Berako Maleteneko Alejandro Altzugurenek 75 euroko bigarren saria eraman zuen.
Egun osoan, besta giroa bizitu zen Beran eta horretan lagundu zuen musika eskolako trikitixa taldeak, musika bandak, txistulari eta txalapartari taldeek eta musika eskolako talde zeltiarrak. Ikastetxe ezberdinetako ikasleek ere, bere produktuak eta zozketak salgai paratu zituzten, gehienek ikasbidaiak ordaintzeko. Lurraren Eguneko lantaldeak taloak prestatu zituen.
Rosa Errandonea omendua
Ikastolako aretoan, Rosa Errandoneak paratutako argazki erakusketa ikusgai izan zen, asteburu osoan. Aipatzekoa da Errandoneak 1995ean lehen erakusketa paratu zuenetik 4.000 argazki eta prentsa errekorte plazaratu dituela eta hortaz, seguruenik heldu den urtekoa izanen omen da azken erakusketa. Larunbatean, Gure Txokoa elkarteak lore-xorta eta txapela eman zizkion Rosa Errandoneari, lan hau omenduz eta Berako Udalak, Errandoneatarren lana biltzen duen CD bat.
Bezperan, hamekagarren barazkiopil lehiaketa ere egin zen. Hameka koadrilen artean, Irene Matxiarena, Itsaso Berroeta eta Mari Karmen Urtxegik osatutako taldeak lortu zuten lehen saria, 100 euro eta kaja bat ardo. Bigarren saria, kaja bat ardo, Zinaurriak I taldeak eskuratu zuen.
Goizean, Jakoba Errekondok solasaldia eskaini zuen Beralandetan, bidenabarkoan, bere azken liburua aurkeztuz.
