Euskaltzaindiaren bisita irailaren 29an
Urriaren 15eko Nafarroa Oinez egun handiaren aitzinetik Euskaltzaindiaren bisita ere izanen dute Lesakako Udaletxean eta Tantirumairu ikastolan irailaren 29an. Ohitura ere bihurtu da dagoeneko. Nafarroa Oinez besta ospatzen den herrira egiten du urtero bisita Euskaltzaindiak. Eta aurten, beraz, Lesakan dute hitzordua ortziralean. Izan ere, bisita honekin aitortza bikoitza egitea da intentzioa: alde batetik, Euskaltzaindiak bere babesa erakutsiko dio Lesakako herriari eta Nafarroa Oinezi, eta bertzetik, Lesakak eta Nafarroa Oinezek akademiaren lanari aitortza eta esker ona adieraziko dio.
Horretarako, Euskaltzaindiako ordezkariei harrera eginen zaie goizean Lesakako Herriko Etxean. Bi erakundeen agur hitzen ondotik, euskaltzainek zuzendaritza batzordea eginen dute bertan. Bukatu bezain abudo, Tantirumairu ikastolara joanen dira. Ikasleek euskaltzainekin solasteko aukera izanen dute, eta irakasleekin prestatutako galderak eginen dizkiete. Hori guztiari amaiera emateko, bazkaria eta Lesakatik bisita gidatua eginen dute euskaltzainek.
