Azken hilabeteotan bestak antolatzen buru-belarri aritu dira Kultura eta Kirol Batzordeko kideak. Urtean zehar ekitaldi gehiago ere egin dituzte, inauterietan I. Trikitixa Jaialdia adibidez, edo maiatzeko mendi lasterketaren antolaketan ere aritu ziren. Baina orain, bestek dute lehentasuna eta horretan ari dira. Argazkian ageri diren Aitziber Lizardi, Ander Almandoz, Julen Oskoz, Igor Ugalde eta Imanol Lukanbioz gain, Itxaro Etxague, Joseba Pikabea, Beñat Mitxelena eta Amaia Lukanbiok osatzen dute batzordea eta kontatu digutenez, aurten «asteburua hobeki probesteko» bestak abuztuaren 13an hasiko dira.
Egitarauan berrikuntza batzuk sartu dituzte. Hala nola, «joan den urteko emaitza ona ikusita eta bestak gogoz hasteko, aurten ere herri bazkaria lehenbiziko egunean eginen dugu, baina aldi honetan, zikiro jatea izanen da». Herritar batzuek proposatu omen dute, eta «probatzea erabaki dugu». Badira bertze nobedadeak ere: «lehenbiziko aldiz, emakumezkoen pilota partida ikusteko aukera izanen dugu». Gainerakoan, haur, gazte eta helduentzako ekitaldiak izanen direla adierazi digute eta «herritarrek eta bisitariek parte hartzea» espero dutela. Gonbitea ere luzatu dute: «elkar errespetatuz, ongi pasa bestetan».